Mae marwolaeth unrhyw blentyn yn drasiedi enfawr i’r teulu a’r gymuned ehangach, felly mae’n bwysig bod pob marwolaeth plentyn annisgwyliedig yn cael ei hadolygu’n ofalus fel y gallwn ddysgu cymaint â phosibl, i geisio atal marwolaethau yn y dyfodol, ac i gefnogi teuluoedd, gofalwyr a ffrindiau.
Ystyr PRUDiC yw Ymateb Gweithdrefnol i Farwolaeth Annisgwyliedig mewn Plentyndod a dyma’r broses sy’n egluro sut mae’n rhaid i weithwyr proffesiynol yng Nghymru ymateb i farwolaeth annisgwyliedig plentyn, i wneud yn siŵr bod yr ymateb yn ddiogel, yn gyson ac yn sensitif i anghenion y teulu mewn profedigaeth.
Taflenni i Deuluoedd a Gweithwyr Proffesiynol
Mae asiantaethau iechyd, awdurdodau lleol a’r heddlu yn deall y broses PRUDiC. Fodd bynnag, nodwyd bod angen datblygu gwybodaeth glir i rieni a gweithwyr proffesiynol perthnasol sy’n esbonio’r prosesau sy’n digwydd yn dilyn marwolaeth annisgwyliedig plentyn.
Mae’r taflenni wedi’u datblygu mewn ymgynghoriad â rhieni â phrofiad bywyd, ochr yn ochr â chynrychiolwyr iechyd ac addysg. Yn dilyn ymgynghoriad, cynhyrchwyd dwy daflen; un ar gyfer rhieni a gofalwyr a’r llall ar gyfer gweithwyr proffesiynol. Gan weithio gyda’i gilydd, sicrhaodd y grŵp fod yr wybodaeth yn cyfathrebu’r broses PRUDiC yn glir ac yn dosturiol i bawb yr effeithiwyd arnynt gan farwolaeth y plentyn.
Rhagolwg Aml-asiantaeth
Datblygwyd y taflenni gan y Gwasanaeth Diogelu Cenedlaethol (NSS), Iechyd Cyhoeddus Cymru, ar ran Rhwydwaith Diogelu GIG Cymru. Grŵp strategol yw ‘Y Rhwydwaith’ sy’n cynnwys aelodau o fyrddau ac ymddiriedolaethau iechyd GIG Cymru, Llywodraeth Cymru, NSS a rhanddeiliaid allweddol eraill.
Mae’r NSS yn ddiolchgar iawn am gyfraniad teuluoedd mewn profedigaeth sydd wedi darparu mewnbwn gwerthfawr a deialog ystyrlon yn natblygiad y taflenni, a hefyd i Dr Claire Thomas am ei harweinyddiaeth ochr yn ochr â’r Byrddau Diogelu Rhanbarthol am gefnogi’r gwaith hwn.
